Хара зандан модондо^[1] эржэгэр гурьбануудые^[2] һиилээд, заанай яһа һуулгажа гоёоһон хитад зурагуудтай халхабшыень саг үргэлжэ һайхашаадаг Самбуу лама, нюдэндөө үнэншэжэ ядаһан юумэдэл, гараараа дахин эльбэжэ үзэбэ. Тэнгэриин үнгэтэй хүхэ саарһан дээрэ алтан хээ^[3] хээлэжэ, дүрбэн ханаарнь тойруулан няагаатай байгаа һэн. Урда ханаар байһан сонхонуудай хоорондо бишыхан түхэреэн стол дээрэ табяатай хитад шаажан домбо^[4] хэды оло хараһаншье һаань, хэлэшэгүй һайханаар мүнөө үзэгдэбэ. Гэр доторхи сүлөө ханануудыень зубшуулжа табяатай богонихон хүлтэй жабдан^[5] дээгүүрнь Персиин урашуулай тэбхэр тэбхэр хибэс^[6] һунаан дэбдижэрхиһэн байна.