ХУУР ЮУГЭЭР БҮТЭЭГДЭДЭГ БЭ?

Наадахи хуурта бухын сууха татагдаад байна

Хуур бүтээхын түлөө арадай дунда нангин гэжэ тоологдодог модонуудые шэлэдэг байгаа. Тэдэнь ямар модонууд бэ гэбэл хуһан болон шэнэһэн. Бүри урда галабһаа хуһан гээшэ бөөгэй шажанда, буряадуудай угай шүтөөнүүдтэ хэрэглэлгэдэ дэлгэрэнги нангин модон, һүлдэ модон гээд тоологдодог байһан юм. Тиихэдэ мориной үһэндэ (илангаяа һүүл) онсо хандасатай байгаа. Хуурай хүбшэргэй номын хүбшэ хоёр мориной һүүлээр хэгдэдэг байһан, мүнөөшье тэрэл хэбээрээ. Гүүнэй һүүл хэрэглэхэ хорюултай байһан юм. Мориной үһэн ада шүдхэрнүүдһээ абарха шэдитэй гэжэ тоологдодог. Мориной үһөөр аргамжа томоод, гэрэйнгээ үүдэ хаажа талада хаяха, тиихэдэ могой тиимэ аргамжа дабажа гарадаггүй юм гэлсэдэг. Хуур бүтээхэдээ сагаан үнгэтэй үһэ хэрэглэбэл бүри һайн гэжэ тоотой. Эндэһээл юм бэзэ, тэрэ бүтээһэн хуураа “хилгааһан хуур” гээдшье нэрлэхэ ушар олон байһан.

Николай Шабаев

Баир Бодиев - хүгжэмтэ зэмсэгүүдые хэдэг залуу дархан