Хазагай ябадалта муу хүнөөр бү нүхэсөөрэй,
Ханилбал тэрээнтэй, уршагта дайрагдажа болохош.
Мүргэлшын хубсаһанда байрлаһан тэрэ бөөһэдэй
Мэхэтэ хулпааһаа тодхортоһон гайда орохош.





ХУЛПААҺАА ТОДХОРТОҺОН БӨӨҺЭНҮҮД

Даяанда һууһан мүргэлшын хубсаһанда долоон бөөһэн байрлаад, бисалгал хэхэдэнь айхабтар һаалта хэдэг болобо. Тэрэ даяанша юумэ алаха, хюдахагүйн һахюулда хүртэһэн тула, үзэлдөө һүзэглэн мүргэхэ үедэнь хазажа зобоохогүйн хэлсээ тэдэ бөөһэдтэй баталба ха. Харин сүлөө ороһон сагтань эдихэдэнь болохо гэлсэбэ. Нэгэтэ хулпаа бөөһэдтөө ерээд: «Иимэ жаргалтай таанад намайе дундаа байлгыт» — гэжэ гуйба. «Бидэ энэ мүргэлшэтэеэ хэлсээ баталанхайбди», — гэжэ бөөһэд тэрээндэ ямар хэлсээтэй байһанаа хөөрэжэ үгэбэ. Хулпаа энэ гурим наринаар сахижа байхаяа мэдүүлбэ. Үнишье болонгүй тэрэ хулпаа: «Гэдэһэмни үлдэнэ, мүргэлшын шуһаар ундалхам, би тэрээнтэй хэлсээтэй бэшэб», — гэбэ ха. Долоон бөөһэд ухаа алдажа: «Ай, болииш, мүргэлшын бисалгажа байха сагтань хазажа бү орхииш. Мүргэлэйнь һүүлдэ эдеэлхэбди», — гэлдэбэд. Хулпаа тэдэнэй үгэдэ оронгүй, мүргэлшын бэе зохолгожо, хазажа оробо. Даяанша мүргэлөө дүүргээд: «Бөөһэд хэлсээгээ эбдэбэ», — гэжэ хубсаһаяа тайлахадань, хулпаа түргөөр тэрьедэн арилба. «Үгэдөө хүрэхэгүй таанадые үгы хэхэдэмни нүгэл болохогүй», — гэжэ мүргэлшэн бөөһэдые түүн абаад, хүйтэн сагаан саһан дээрэ хаяба.

Муутай ханилхада, муухайгаараа хажуудахи бэшэнээ мууларта оруулха гэһэн домогой удха иимэ бэлэй.


Ринчен НОМТЫН


<< гэдэргээ гаршагсаашаа >>