Мэргэн заабари хорото үйлөөрөө гутааха
Муу абаритада һургаал хэлэжэ бү зутара.
Мэеэрхэһэндэ бодожо, өөрынш үүрые һандааха
Мэшэн мэтэ хэрзэгы амитад тэрээхэн зуура.

МЭШЭН ГАЛАНДАГА ХОЁР

Галандага шубуун һармагшантай дүтэ нүхэд болоод, набша намаа элбэгтэй хуша модондо байрлаба. Хушын узуурта галандага уургайгаа заһаба. Һармагшан модоной оройдо гаража хонодог болобо. Нэгэтэ һүни мүндэртэй хүйтэн аадар адхаржа, модоной оройдохи һармагшан ехээр зүдэрбэ, шобто норобо. Тэрэнэй зобохыень галандага харахадаа, нүхэрөө хайрлажа, иигэжэ хэлэбэ:

Ханимни, бэешни габшагай солбон,

Хүсэ шадалтай үе мүсэтэйш —

Хуша модондомнай намаа элбэг,

Хэхэ ажалгүй ябанхаар тэндээ

Хохидолгүй хонохо байра түхеэрыш.

Эгээ ядабал буужа наашаа ерыш,

Эшээн болгожо уургаймни нэгые эзэлыш.

Һармагшан галандагын эдэ үгэнүүдые дуулахадаа өөдэрхэнэ гэжэ уур сухалаа орьёлгон: «Ахир жаахан шубуун аад, намда һургаал заажа һүрхэйтэнэ гүш, уургайтайдаа жаргалтайб гэжэ дээрэлхэнэ гүш?» — гэжэ хашхарга табин, үүрыень һандаргажа хаяба.

Һабагүй тулюур хүндэ һургаал хэлэжэ, һанаагаа зобохо гээшэ гэмшэл ехэтэй хойшолондо асарха гэһэн бололтой.

Ринчен НОМТЫН

<< гэдэргээ

гаршаг

саашаа >>