ЭДЭЭР БАЯН АДАГ, ЭРДЭМЭЭР БАЯН ЭРХИМ

Элдэб юумэн баян тэнэгүүдэй доторшье үзэгдэдэг.

Эрэлхэг зоригто баатар адагуусандашье байдаг.

Эндүүрэлгүй удха түгэлдэр үгүүлэгшэ мэргэд

Энэ юртэмсэдэ үнэндөө маша шухаг.

Сажа бандидай сойн ном Субашидһаа:

Эд малаар элбэг баяшуул

Тэнэгүүдэй дунда олон.

Омог баатар зоригтойшуул

Арьяатадайшье дунда олон.

Олон мэргэшүүлэй дунда

Номой удхые үгүүлэн тайлбарилха

Ухаан һонор бэлигтэ хүн

Энэ юртэмсэдэ тон хомор.


Дармабазар гэгээнэй хэлэһэнэй ёһоор:


Эдээр баян адаг,

Эрдэмээр баян эрхим.


Жообын гэгээнэй номһоо:


Шүдхэрэй хүн боложо түрэбэшье,

Бурханай ном соносхогүй тэрэниие

Уһанай болон ойн хүнтэй жэшэжэ.


Адлишаажа огто болохогүй гээшэ, — гэжэ удхалан хэлээд, үльгэрлэхэдөө уһанай хүн, мүн тиихэдэ ойн хүн маха бодоороо хүнүүдэй дүрсэтэйшье бол, шанараараа адагуусанһаа илгардаггүй гэһэн юм. Тэрэшэлэн номгүй хүнэй бэень тэдээнтэй адли гэжэ номнобо. Тиимэ тула тэнэг хүн элдэб эд хогшолоор баяжаад, тэнгэриин мэтэ бүтээл нэгэнтэ хүсэлдүүлбэшье, эрдэм номгүй дээрэһээ: «би хүмби, би баянби» гэжэ бэеэ дээгүүр үргэбэшье һаа, адагуусанһаа холо ошоогүйнь элитэ. Харин адагуусанай дунда баатар хүсэтын бии байдагые иимэ үльгэрөөр удхалан түүрээе.

Шубуу шонхорые нюдархадаа алдажа, байса дайрахадань хэмхэрһэн шулууе харсага харахадаа иигэжэ хэлэһэн гэхэ:


Бэемни жаахан болобошье,

Баатар эди хүсэмни

Байсые хамхалха хабатай лэ.


Үшөө иимэ үльгэр. Эрэ бүргэд үхэһэн хүдэриин һэе һабардажа дэгдээд, даажа ядан алдахадань, эмэ бүргэд агаарта тэрэнииень саб шүүрэжэ, саашаа ниидэбэ. Эмэ бүргэд эрэ бүргэдһөө үлүү шадалтай иигэжэ харагдаһаниинь адагуусандашье баатар хүсэтэн бии гэһэн удхатай. Тэрээгээр болоходоо ухаан болон баатар эди хүсэн хүнһөө ондоо амитадташье бии гэһэниинь ойлгосотой.


Ринчен НОМТЫН


<< гэдэргээ гаршагсаашаа >>