БУРХАНДА ЗҮБӨӨР МҮРГЭХЭ ГУРИМ

Гэр соогоо тахижа байһан тахил, бурхадтаа үдэр бүри мүргэжэ байхын тулада мүргэхэдөө шала дээрэ шэрдэг гү, али палас дэлгээд, мүргэлөө дүүргэхэдээ, хумяад абажархихада тон таарамжатай. Тэрэнэй үргэниинь 1 метр, утань 2 метр гэхэ гү, али нэгэ бага үлүү байхадаа хамаагүй.

Зүбөөр мүргэхын тула хоёр гарайнгаа альгануудые зэргэлүүлэн наманшалха ёһотой (зураг дээрэ харагты). Энэ хадаа сэсэн ухаан болон энэрхы сэдьхэлэй һүлдэ тэмдэг – дэльбэеэ хаагаад байһан бадма лёнхобо сэсэгэй дүрсэ болоно. Досоонь тохиил-гоод байһан эрхымнай – сэнхии. Тэрэ сэнхии дээрэмнай Бурхан багша залараад һууна гэжэ сэдьхэхэ ёһотойбди.

Наманшалһан гараа духа дээрээ, амандаа, үбсүүн дээрээ хүргэхэдөө, бидэ ухаан бодол, хэлэн, бэеынгээ талаһаа муу юумэ гаргангүй, һайн ябадалаа арьбадхахын, муу муухайһаа холодохын түлөө Бурхан багшаһаа адис үреэл абана гээшэбди.

Тиигээд тонгойжо, гараараа газар тулаһан хойноо үбдэг дээрээ һуужа, гарнуудаа урагшань дабшуулаад, толгойгоо газарта хүргэнэбди. Һөөргөө бодоходоо, гарнуудаа гэдэргэнь болгожо, үбдэгүүдээ газарһаа таһалжа, удаань үльмы дээрээ бодонобди.

Үшөө һунажа мүргэлгэ гэжэ бии. Һунажа мүргэхэдөө, миин мүргэһэндэл тон адляар үбдэг дээрээ һууһан хойноо гарнуудаа урагшань дабшуулжа, бүхы бэеэрээ газар дээрээ гонзойн хэбтэшэнэбди. Тиигэжэ духаа газарта хүрэһэн хойноо хоёр гараа ниилүүлжэ наманшалаад, тохоногоо газарһаа үргэнгүй, гараараа толгой дээрээ наманшалнабди.

Иигэжэ 3, 7, 21, 108 гү, али наһанайнгаа тоогоор мүргэжэ болоно. Мүргэжэ дүүргэһэн хойноо бурханайнгаа урда ошожо зогсоод, гараараа духа дээрээ, амандаа, үбсүүн дээрээ хүрэжэ, наманшалһан зандаа тонгойжо, толгойгоо табюурта хүргэн, бурханһаа адис абанабди. Заал һаа табюурта тархияа хүргэхэ ёһотой гэжэ һануулая.

Тэндэһээ холодоходоо, олон бурхад руугаа нюураараа харан, гэдэргээ ябажа гарахадаа, олон бурхадаа, Бурхан багшаяа хүндэлжэ, тэрээгээрээ бэеэ, хэлэеэ, сэдьхэлээ арюудхажа ябаһан болонобди.

Тимофей НИМБУЕВ