ГЭРТЭЭ БУРХАНАА ЯАЖА ТАХИХАБ?

Үдэр бүри Бурхан багшын адиста хүртэжэ, мүргэжэ байхын тула гэр байра соогоо тусхай үргэлэй газар бүтээжэ болохо юм. Энээниие бүтээхын тула табюур, Будда бурханай дүрсэ гү, али зураг, долоон сүгсэ, нэгэ томошог наһата хэрэгтэй болохо. Эдэ бүгэдые олоод байхадаа, санаартан ламые залажа, бурхадаа арамнайлуулха ёһотой ааб даа. Тиигээд байхадамнай олон бурхадай заларжа байһан аригуун газар гэр соомнай бии болобо гээшэ. Үнэн сэдьхэлһээ оролдожо, тахижа, мүргэжэ байбал, бурхаднай манаа абарна, маниие хорложо болохо муу һүнэһэд болон муу юумэнүүд гэр соогуурнай орохоёо болибо гэжэ этигэхэ шухала.

Бурхадаа арамнайлуулжа тахиһанайнгаа удаа үдэр бүхэндэ бага аригам гэжэ нэрэтэй тахил үргэжэ байдаг болохомнай шухала. Зүүн гарһаа түрүүшын хоёр сүгсэ соо уһан табигдадаг. Гурбадахи сүгсэ соонь барайгар хээд, дээрэнь сэсэг һуулгаха, хэмэлшье сэсэг табижа болохо.

Дүрбэдэхи сүгсыень баһа барайгараар дүүргээд, досоонь бүдүүн хүжэ һуулгаха. Зүгөөр энэ хүжэдээ гал аһаадаггүй юм. Сан табиха ондоо хабтагар амһарта гү, али сүгсэ байха ёһотой. Удаадахи һууридань томо наһата соо зула бадараагдана. Зулын гол тоһонһоо дээшээ нэгэхэн орооһоной зэргээр бултайха ёһотой. Зулын голой үндэр, галайнь ехэ байхада бурхад дурагүй байха юм гээ. Мүн дүлэтэжэ, гал аюул боложо болохо, аймшагтайшье бэд даа. Дан богонёор бултайһан голтой һаань, элшэнь бага, тахигшадай бэедэ муу нүлөөтэй гэдэг.

Табадахи сүгсэ соо хангалтай һайхан уһан байха ёһотой. Тиимэ уһан гэжэ сэдьхээд, юрын уһаар дүүргэхэдэ болохо. Зургаадахи сүгсыень амтатай эдеэгээр дүүргэнэбди. Долоодохи сүгсэ соонь хүгжэм үргэнэбди. Ушар тиимэһээ сүгсэ соо хонхохониие гү, али дун бүреэ табижа болохо.

Бэе бэеһээ 3-4 миллиметр зайтайгаар, эдэ долоон сүгсэ, нэгэ шугам дээрэ байһан шэнги, тэгшээр зэргэлүүлэн табигдана. Тиигээд зулаяа аһаажа, сангаа табиһан хойноо, “Ом а хум” гэжэ 3 дахин тарни уншажа, бурхандаа үргэһэн энэ тахилаа арюудханабди.

Энээнэйнгээ удаа бурхандаа 3-7-21 гү һунажа мүргөөд, эрхи маанияа татадаг гээшэбди. Өөрсэ янзын физкультура болодог юм гү, бурханда оло мүргэдэг хүнүүдэй бэень элүүр энхэ, сэдьхэлынь уужам ябадаг гээшэ.

Үдэр бүхэндэ бурхандаа үргэһэн тахилнай, һайханаар сэдьхэлээ, хэлэеэ, бэеэ барижа мүргэһэн мүргэлнай гэгээрэлгын эхин үндэһэн гэжэ Бурхан багшын һургаал дагагшад мэдэрхэ зэргэтэй гээд хэлэе.

Д. Гармаевай гэрэл зураг

Тимофей НИМБУЕВ