Гэрэл зураг: Оюна Будаева |
Хэдынэй сагта, ямар газарта хониёо адуулхаб гэһэн иимэ дүримүүдтэй байһан юм:
• аһанай хайлахалаар, шулбыда адуулбал, мал һэргээд орхихо;
• Хээли ехэтэй хониёо үндэр газарта адуулхагүй;
• Ургын гарахалаар, хэдэн хоног ургытай газарта адуулха;
• Тиигээд ая гангатай газарта адуулха, ногоондо садажа байха үедэнь түргэн сагаан гэжэ үбһэтэй газарта адуулхада хатайр үбшэнһөө һэргылхэ,
• Хурьгадаа садхаахаяа, хонин һү орог гээ һаа, далан шагшага гэдэг жэжэ сагаан сэсэгтэй газарта адуулха;
• Хабарай сагта хонидые ехээр уһалжа болохогүй;
• Зундаа хада гүбээгээр, һэрюун газараар адуулха, үглөөгүүр эртэ бэлшээхэ. Тэрэгүйдэ үдэрынь халуунда хургаад, мүртэй эдеэлхэгүйдөө, хонин таргалхагүй.
• Шадаал һаа хүлэрын хүхые эдюулхые оролдохо (энэмнай түймэрэй болоһон газарай ногоон гээшэ).
• Шүүдэрэй хатаагүйдэ гол газараар ябуулхагүй, балшаруутаха;
• Намартаа холо туухагүй, түргөөр ябуулхагүй, хонин тураха. Энэ үедэ һайнаар уһалха;
• Үбһэнэй алаглажа (хагдаржа) байха үедэ үзүүртэ (намарай эхинэй гэхэ гү, али эртын намарай хагданда) гаргаха, адуулха;
• Үзүүрэй (намарай эхинэй гэхэ гү, али эртын намарай хагданда) һүүлээр сахилзада оруулхада мал турахагүй.
• Намартаа зуһалангай хэнзэ ногоондо адуулжа, марса долёолгоходо, мяханиинь амтатай, нооһониинь ута, үдхэн болохо.
• Марсада адуулаад, һалхи һүрюулжэ туухада, турьяхадань, хамарайнь һархяаг соохи хорхой гарадаг;
• Намартаа һайнаар уһалха, эдеэлүүлхэдэ хонин таргалжа, яһаниинь бүхэжэдэг, мяханиинь зузаардаг, уһагүй тала газарай зоной мал саһа эдеэд лэ үбэлжэдэг байгаа. Зарим тала газарнуудта зундаашье уһагүй байдаг.
Буда-Ханда ЦЫРЕНДОРЖИЕВА
<< гэдэргээ | гаршаг | саашаа >> |