МОДО ШЭДЭЛГЭН

Энэ наадые үбэлэй сагта һарын сагаанда эмхидхэхэдэ, ехэ һайн.

Нэгэ гэр гү, али сарай олохо хэрэгтэй. Тэрээниие тойроод — сэбэр тала. Саһаар хушагданхай.

Сарбуугай шэнээн бүдүүн, хахад метр утатай бургааһа гү, али уляаһа оложо, тэрэнэйнгээ холтоһо хуулажа сагаалнабди.

Тиигээд гэрэй ара талада, һарын туяа гэрэлэй һүүдэр татаһан газарта бүхы үхибүүд хана тээшэ хараад зогсохо. Хүсэ һайнтай нэгэ хүбүүн гэрэй орой дээгүүр үнөөхи сагаалһан модоёо шэдэжэрхихэ. Тиигэмсээрнь тэндэхи үхибүүд гэрэй хоёр тээгүүр харайлдан гаража, хаанашьеб унаһан модо бэдэрхэ.

Сагаалһан модые саһан дээрэ олохонь бэрхэтэй. Олоошье һаа, мэхэтэй байха хэрэгтэй. Юуб гэхэдэ, тэрэ модоёо баряад, үнөөхи гэр тээшэ хэндэшье хүсэгдэнгүй гүйжэ ошоод, булангынь тоншохош. Зуурандаа хүсэгдөө һаа, модоёо буляалгахаш. Эндэ хурдан хүн, хүсэтэй гар, һонор ухаан хэрэгтэй.

Георгий ДАШАБЫЛОВ