ЗАНТАХИ

Манай нютагай ан гүрөөлнүүд соо зантахи шэнги шуһархаг, муухай зантай амитан үгы гэдэг. Харахада доргоншуушье, багахан баабгайшуушье, барбагар хара үһэтэй амитан. Бэень хүндэ, хүлынь богони гэн гэхэдэ, хүнгөөр ябадаг. Бамбагар һэбхи саһандашье һаатахагүй юм. Ехэ хүсэтэй, шэрхи гээшэнь хэлэшэгүй. Хурса хюмһатай, бүхэ шүдэтэй аад, өөрһөө бүри томо амитаниие таһар удар татажархиха юм. Ехэнхидээл жэжэшэг амитадые барижа эдидэг. Газарта гэтэжэ хэбтээд гү, али модоной гэшүүһэн дээрэ гараад гү, амитанай дайралдахада, гэнтэ нюрган дээрэнь һүрэхэ мүртөө хүзүүень хазажа аладаг юм гэдэг. Ан дахахадаа һалаха һандахагүй, хэдэн хоног соо намнажа, тэрэнээ эсээжэ баридаг.

Нэгэ ангуушан ябажа ябатараа орын һэе дээрэ хүрэжэ ерэбэ. Тиигэн гэхэдэнь тэрэнэйнь дороһоо зантахи гараад тэрьелшоо. Орынгоо һэеын доро нүхэ малтаад, тэрээн соогоо унтажа байгаа бшуу. Ангуушадай зүүһэн занга, хабхануудта ороод байһан амитадые зангын эзэнһээ үрдижэ барижархидаг. Ангуушадай байрада орожо, хүнэһэ хоолынь хуу эдижэрхиһэн байдаг. Өөрөө зангада орохонь хомор гэдэг. Хэрбэеэ ороошье һаа, хүлөө таһа хазаад ябашаһан байха юм гэнэ.

Байгалай урда бэеэрхи ангуушад хэлэхэдээ, зантахи зүг бүриһөө нохойнуудта хүреэлүүлшоо һаа, тиимэ гэхын аргагүй муухай үнэр гутуулдаг юм гэдэг. Тиихэдэнь нохойнууд тэрээндэ огто дүтэлдэггүй. Бэеэ аршалха тиимэ арга зарим анда байдаг юм.

Зантахиин арһан харахада гоё аад, хүрдэгэр хатуу, элдүүри болодоггүй. Тиимэһээ тэрэниие хүн зон ехэ агнадаггүй.

Лодон ЛИНХОВОИН