ГАЛААР ҺҮРДӨӨБЭ

Гурбан малшад хадатай, ойтой газарта малаараа байба ха. Нэгэтэ үдэшэ тэдэнэр сай шанаха гэхэдээ балгашье уһагүй байба. Набтархан бэетэй наһажаал хүниинь хүнэг баряад, уһанда ошобо. Буутай байгаашье һаа, горхон ойро, модошье хүрэхэгүй даа, дүтэ шадар ан гүрөөл байхагүй гэжэ һанаад, тэрэнээ абабагүй. Ябаһаар ябатарнь, мүр дээрэнь нэгэ унаһан модон хэбтэбэ. Тэрэнэй саада тээ уһан елбэгэнэжэ байна. Үбгэжөөл яаражашье ябаа һаа, ой модо руу шэртэн харана. Юумэнэй һаршаганахашуул гээ һаа, байгаад шагнаархана. Ойл хадаа ой, һэргэг ябаха хэрэгтэй. Барбагар баабгайтай нэгэтэ бэшэ хүсэеэ үзэлсэһэн байгаа.

Гэнтэ арадань юумэн һаршаганаха шэнги үзэгдэбэ. Эрьелдэжэ үрдеэгүй байтарынь баабгай тэрэниие тэбэришэбэ. Үбгэжөөл бүһэдөө хабшуулаатай байһан хутагаяа һуга татаха мүртөө ара тээшээ баабгайн гэдэһэ руу шааха гэһэн аад, үхэлтэ газарынь онобогүй. Баабгай шанга гэгшээр бархиран, үбгэжөөлые табяад, хажуу тээшээ һүрэшэһэн аад, дахин аһаба. Үбгэжөөлэй хүлынь туяганаад, тулгалжа ядана. Хоолойгоорнь шуһан дүүрэшэбэ. Хутагаяа алдажархиба. Баабгай бархиржа байгаад, тэрэниие балбажал байна. «Хайшан гэжэ амиды гарахамни гээшэб? Үхөөшэ болоод, хүдэлэнгүй байгаа һаам, носохоёо болихо бэшэ ха гү?» гэжэ һанаад, хүдэлхэеэ болишобо. Баабгай тэрэниие газарта табижа, нюурынь үндэжэ үзөөд, шоройгоор булажа эхилбэ. «Юумэ үжөөжэ эдидэг һэмнэй даа, намайе тиигэхэ гээ. Теэд үшөө унаһан модоор дарадаг ха юм. Яаха гээшэбиб?» гэжэ һанаашье һаа, яахашье аргагүй. Дуулан гэһээнь, баабгай модо нижагануулжа байба...

«Энэш галһаа, утаанһаа айдаг һэмнэй, хүүртигтээ гал аһаажа үзэхэ юм байна» гэжэ һанахатаяа хамта хармаанһаа зуруулаа арай гэжэ абаба. Хэды модыень хухалһанай һүүлдэ аһаажа, хуушан хүүртигэйнгээ хахархайһаа бултайһан хүбэндэ хүргэһэниинь аһашаба. Тиигэһээр байтарынь баабгай томо модо тэбэреэд ерэжэ ябатараа гал харажархин гэхэдээ, ухаа алдан модоёо хаяад, саашаа гүйшэбэ. Үбгэжөөл амиды үлэбэ гээшэ гүб гэжэ этигэжэ ядаһаар мэдээ табишоо һэн.

Нүхэрэйнгөө нэгэ хэһэг ерэхэгүйдэ байрадаа үлэгшэдынь гайхалсаба. Тэрэмнай миин зайжа ябана бэшэ, аюул болобо гээшэ бэшэ гү гэлдээд, бэдэржэ гарабад. Ябаһаар дүрэжэ байһан хүбэнгэй үнэрөөр, утаагаарнь нүхэрөө олоо һэн. Тэрэнээ байрадаа асараад, тэрэ һүниндөө колхозойнгоо түб һуурин мэдээсэһэниинь, хотоһоо вертолёт ерэжэ, үбгэжөөлые эмнэлгэдэ абаашаа. Хоёр һара тухай аргалуулжа һайн болоод, тэрэнь мүнөөхил ажалдаа ороо һэн. Нюуртань лэ ягаабтар һорьбонууд үлэхэһөө бэшэ, бэень ямаршьегүй болоо бэлэй.

Лодон ЛИНХОВОИН