САНУК БААБГАЙ ХОЁР

Санук гэжэ долоон наһатай басаган нэгэ үглөөгүүр һургуулидаа ошожо ябаба. Үбэл байгаа. Гэрынь тосхонһоо нилээд холо һэн. Ходо ябадаг зүргэ харгыгаараа ябатарнь, гэнтэ урдань томо гэгшын баабгай байжа байба. Баабгайн эшээндээ ородог саг болоһон аад, энэ юундэ ороогүй юм? Басагые харан гэхэдээ, баабгай хойто хүл дээрээ бодоод, урдаһаань харашаба, Санук айбагүй. Үбгэн эсэгэнь баабгай буудадаг, гүлгэдынь барижа асараад, сарай соогоо байлгадаг аад, Санук тэдэнтэйнь наадажа дадашаһан байгаа.

Жэмэс түүхэеэ ой соогуур үбгэн эсэгэтэеэ ябахадань, баабгай яһалал дайралдадаг һэн, тиигэбэшье хүндэ ородоггүй, харин зайсаад үгэдэг байгаа. Теэд энэ баабгай зайсахагүй юм. Санук портфелеэ далайгаад, тэрээн тээшэ дүтэлжэ, “Хойшоо боло, би һургуулидаа яаража ябанаб” гэбэ. Тэрэнь тархияа хэлтылгэжэ байгаад хаража байтараа, басаганда туласа хүрэжэ ерэбэ. Басаганай портфелеэрээ үбсүү руунь нэгэ буулгаад абахадань, баабгай портфелиинь шобто татан абажа, үндэжэ үзөөд, шугы руу оро хираагүй шэдэжэрхибэ. Тиигээд зүүн мүртэнь һабараараа халта хүрөөд абаба. Санук айнгүй, тэрэниие үдьхэлжэрхихэдэнь, малгайень хуу татажа абаад, баһа шугы руу шэдэбэ.

Иигээд лэ оромой томо баабгай, бишыхан Санук басаган хоёр урда урдаһаа хараад байшабад. “Энэ зайсажа үгэхэгүйнь гээшэ, хайшан гэхэм гээшэб” гэжэ басаган һанан гэхэдээ айдаһаниишь хүрэшэбэ. Тиихэлээрээ буруу тээшээ эрьелдэн гэхэдэнь, баабгай тэрэниие саб шүүрэн тэбэришэбэ. Басаган мэдээ ороходоо, модоной шэлбэһэ, набшаһаар хушаатай хэбтэжэ байба. Баабгайнь үгы хэбэртэй. Басаган түргэн бодоод, гэр тээшээ гүйжэ ерээ һэн гэдэг.

Лодон ЛИНХОВОИН