ТЭБДЭЭГҮЙ

Нэгэ ангуушан Байгал шадарай ой соо зэмьеэдэ байрлаад, агнуури хэжэ байба. Нэгэтэ үглөөгүүр агнажа ябатарынь, ой руу ошоһон нохойнь борохо абяан дуулдаба. Абяанай гараһан тээшэ шамдуун ошоод харахадань, нохойнь нэгэ томо гэгшын хушын оёороор иишэ тиишээ гүйжэ, собхошожо байгаад, хусажа байба. Юушье болоһыень обёоржо ядаһаар ойротон гэхэдэнь, дээрэһээнь аймшагтай томо баабгай барбагад гээд һүрэшэбэ.

Ангуушан буудабашье, алажа шадабагүй. «Халта хадхуулһан хара гүрөөһэн» гэһэн хуушанай үгэ һанаандань оробо. Шархатаһан баабгай галзууржа, дахин буудахынь үрдюулэнгүй, хүлыень саб шүүрэбэ. Ангуушанай тэрэнэй тархи руу буугаараа нэгэ буулгахатай хамта буунь оро хираагүй этэрэгдэшэбэ. Үргэлжэ ябаһан үргэбшэ соохи һүхэдөө яашье хүрэжэ ядаба. Баабгай хойто хүл дээрээ бодохо мүртөө тэрэнэй зүүн гарые зуугаад, унагаахаар забдаба. Араһаань аһашаһан нохойе бүри хэрэглэнэгүй. Ангуушан тэбдэжэ байгаагүй. Тэрэ зуура баабгайн аман соо байһан гараа улам саашань хоолой руунь түлхибэ. Тиигэжэ носолдожо байтараа хүлынь туягад гээд, үбдэг дээрээ һуушаба. Тиигээшье һаа, баруун гараараа бүһэдөө байһан хутагадаа хүрэжэ, тэрэнээ абаад, баабгайн хоолой руу шаажархиба. Баабгайн үхэдхэн унашахада арай гэжэ амынь заалажа, гараа мулталһан байгаа.

Ангуушан ухаа мэдээ алдажа тэбдээ һаа, арьяатанда барюулха байгаа бшуу. Ямаршье аюултай дайралдаа һаа, доро зүрхэтэй баймаар гээшэ аабза.

Лодон ЛИНХОВОИН