ОЛЗО

Хүдөөгэй һургуулиин нэгэ багша ой соогуур агнаад, һаруул байһан дээрэ ангуушадай зэмьеэдэ хүрэжэ үрдихэ гэжэ ябаба. Гэнтэ модоной хухарха абяан дуулдажа, нохойнуудынь урагшаа даб гэлдэбэ. Нохойнуудайнь хусаан улам саашаа болобо. Эдэмни томо ан дахаба гээшэ ха гэжэ ангуушан мэдэбэ. Хэды алха ябан сасуу хандагайн тугал дээрэ ябашаба. Хараха янзада, гараһаар арбашье хоноогүй хэбэртэй, бишыхан амитан ойн оёорой үндэр хагдан соо хорошоод хэбтэнэ. Хажуудань саашаа ошоһон томо хандагайн мүрнүүд... Энэ тугалай эхэнь тэрьелээ ёһотой.

Хүнэй ойртохолоор тэрэ тугал харайн бодоод, хажуу тээшээ алхалба. Теэд холо ошонгүй тогтобо. Нариихан утанууд хүлтэй, дэрэ дэльбэгэр шэхэтэй юумэхэн айһан нюдөөр харашоод, хамараа һарналзуулан байба.

Нохойнуудынь гүйлдэжэ ерээшье һаа, хандагайн тугал ехэ хэрэглэбэгүй. Нохойшье нарай нялха амитаниие гамнана гээшэ бшуу даа.

Иимэ амитаниие гансаарайнь орхижо болохогүй гэжэ ангуушан һанаад, арай гэжэ тэрэниие баряад, хүүртигээрээ орёожо үргэлөөд, зэмьеэдэ абаашаба. Тэрэнь түрүүшээр айнгяар шэшэрхэдэжэ байһанаа баймга дадажа, угжа соо һү хээд үгэһэниинь ехэ хомхойгоор хүхэбэ. Тиигэһээр хүндэ дадаа һэн ааб даа. Олзо гэжэ нэрэ үгэһэниинь тэрээндээ һураад, дуудахадань гүйжэ ерэдэг болоо һэн.

Хэдэн жэл үнгэрбэ. Хандагай үдэртөө дүтын ой соогуур бэлшээд, үдэшэлэн һөөргөө ерэдэг байгаа. Һургуулиин һурагшад тэрэниие эдеэлүүлдэг һэн. Үхибүүд нютагайнгаа хүбшэ тайгаар аянда гарахадаа Олзодоо юумэеэ тээгээд ябадаг бэлэй.

Лодон ЛИНХОВОИН