ОЙН АЙЛШАН

Түмэр харгын ажалшан хүдөөдэ, ойн захада байратай байгаа. Нэгэтэ тэрэ үбгэн буугаа абаад, харгыгаа эрьежэ ябатараа, хандагайн шэнэхэн мүр хараба. Һайса адаглахадань, хандагайе шононууд дахаһан байба. Мүр мүшхэжэ, саашаа ошоходонь, бисархай тархитай шоно хэбтэбэ. Бүри саашаа ябажа харахадань, үшөө нэгэ шоно хандагайн баруун, зүүншье талада гаража ябажа дахаһан хэбэртэй. Үбгэнэй шугын саана гарахада, хандагай тогтоод байшаһан, тээ ойрохононь шоно мүлхижэ ябаба. Шонын эгээл һүрэхын тэндэ үбгэн буудажа, тэрээниие мухарюулжархиба. Хандагай баруун гуяа болон сээжэеэ шархатаһан байгаа.

Мүнөө болоод байхада хүнһөө ехээр үргэбэгүй. Үбгэжөөл тэрэниие аюулһаа амиды гараа хадаа тэнхээ тамиртай болоно ааб даа гээд саашаа ошобо. Хэды алха ябаад, һөөргэ хараһаниинь, хандагай хойноһоонь дахажа ябаба. Үбгэнэй гайха гайхаһаар гэртээ ерэхэдэнь, хандагай хорёод метр газарта дүтэлөөд байшаба. Үбгэн нэгэ бухал үбһэтэй аад, тэрээнэйнгээ дээрэхи саһа арилгажа, хүнэгөөр дүүрэн уһа үбһэнэйнгөө хажууда табяад, мүнөөхи шононуудай арһа асархаяа санаараа ошобо. Хоёр шоно үбшэтэрөө нилээд удаан болоо ааб даа. Һөөргөө ерэхэдэнь хандагай хүнэгтэй уһынь уужархиһан, үбһынь эдижэ байба. Иигээ хадаа энэ эжэлшэхэнь гээшэ гэжэ үбгэн бодобо. Тэрэнь түрүүшээр шэнэ байдалдаа дадажа ядаба. Галта тэргын хуугайлхада ой руугаа гүйжэ арилшаха, тээ байд гээд бусаха юм. Тиигэһээр айхаяа болёо һэн. Шархануудыньшье бүтэбэ. Үбгэнэй харгыгаа эрьежэ ошоходо, заримдаа дахаад ошолдодог болоо һэн.

Хабар болобо. Хандагай хэдэн хоногто ой соогуур ябаад ерэдэг байба. Нэгэтэ ой руугаа ошоһон аад, удаан үгы болошобо. Хээрын лэ амитан хадаа хээрын, ерэхэеэ болёо юм ааб даа гэжэ һанаад байтарнь, нарайхан инзагатай болоод ерэбэ. Хүбшэ тайгадаа ошожо түрөөд, тугалаа тэнжээгээд ерээ бшуу даа.

Тэрэ хоёр үбгэжөөлые дахаад ябадаг байгаа. Түмэр харгыгаа эрьежэ гарахадань, хоюулаа дахажа, эхэнь ойн захаар, тугалынь харгын боорёор ябадаг һэн.

Хандагай гээшэ зэрлиг амитан ха юм даа. Теэд яахадаа хүниие дахажа, өөрөө гэртэнь ерээд байшабаб? Мүн тугалтайшье болоод байхадаа һөөргөө бусажа, айлда байражаһаниинь гайхалтай юм.

Лодон ЛИНХОВОИН