Хүдөө ажахын техникумэй мал адууһан ойн талмайда байдаг һэн. Нэгэтэ үбэл малайнь байрада томо гэгшын бодон гахай ерээд, обоолоотой хохир шэбхэ соо хэбтэдэг болобо. Дулаан байгаа юм ааб даа. Иимэ гахай ехэ хүсэтэй, шэрүүн абаритай байдаг. Мал барихашьегүй һаа, һаалта байгаа. Нэгэ ангуушан тэрэниие буудахадаа, хүлынь шархатуулаад алдажархиба. Тэрэнь тэрьелжэ ошоһоор ерэхэеэ болёо һэн.
Намар болобо. Тэрэ ажахын ажалшан хүн агнуурида гараад, нугаһа буудаха гэжэ, ойн соорхойн дундахи нуурай эрье ошобо. Нуурай эрьеын ожорһон соогуур ябатарынь, адар томо аад, дохолон гахай гүйжэ гараба. Тэрэниие хэрэглэнгүй орхёо һаань, яахашьегүй байгаа. Теэд тэрэ хүн жэжэхэн шаба һомотой буугаар гахайн тархи руу буудажархиба. Тиимэ жэжэ һомон томо азарга гахайн тархиие даагаагүй ааб даа. Гахай галзуурһан юумэдэл, тэрэ хүн тээшэ гүйжэрхибэ. Ангуушад хэлэхэдээ, шархатаһан гахай ямаршье арьяатанһаа үлүү аймшагтай, аюултай юм гэдэг. Мүнөөхи хүн тиигэжэ мэдэхэ аад, буугаа хаяад, бүхы шадалаараа шармайн гүйжэ, дүтэ байһан томо модондо арайхан үрдижэ аһашаба. Гахай гуталынь хаха хадаржа, хүлынь халта шулгалаад, шуумайн үнгэрбэ.
Һөөргөө эрьен бусажа, хурса һоёогоороо хүнэй аһаһан модо хадаржа эхилбэ. Тээ саашаа гүйжэ ошоод лэ бусана. Нэгэ холодохо һамбаандань ангуушан буухаар забдаба. Теэд бодон гахай мүнөөхил бии болоод байха юм. Модониинь эли бодо нарин боложо байба. Тэрэ хүн яахашье аргагүй бэрхэтэй байдалда оробо.
Хүн гахай хоёр бүхэли хоног соо иигэлдэжэ байгаа һэн. Ажалайнь газарайхид тэрэ хүнөө үгылжэ, бэдэржэ ерэбэд. Талаан болоходоо тэдэнэр удаан бэдэрэнгүй сэхэ дээрэнь орожо ерээ һэн. Олон хүн зоной шаг шууяа дуулаһан гахай хүбшэ тайгын гүн руу тэрьелээ бэлэй.
Зоной халтал удаан болоо һаа, муу юумэнэй тохёолдохонь лаб байгаа. Тэрэ хүнөө абаашажа эмнэлгэдэ оруулһаниинь уданшьегүй элүүр боложо гараа һэн. Гансал үһэниинь саб сагаан болошоо бэлэй.
Лодон ЛИНХОВОИН
<< гэдэргээ | гаршаг | саашаа >> |