БОДОН ГАХАЙ

Зэрлиг гахайе бодон гахай гэдэг. Тэдэ хабартаа шэрэнги, шугы соо байдаг. Шулуунай забһарааршье ороод хэбтэхэ. Ургажа байһан бүдүүн хуша модоной узуурта бургааһа, ногоогоор дэбдихэр хээдшье хэбтэдэг. Нэгэ газарта арба гараараа һүрэглэн байха юм. Эмэ гахайнь гүлгэдтэеэ байна. Эрэнүүдынь ганса гансаараа амяараа ябадаг. Заабол уулын оройдо хэбтэхэ юм. Ябажа байха зуураа, шүдөөрөө модо үрэһэн байдаг, шүдэеэ хурсадхадаг гээшэ ха.

Намар ороонойнгоо урда эдеэлхэеэ болишохо юм. Дабирхайтай шэнэһэндэ бэеэ үрэжэ үрэжэ, даладаа дабирхай һайса няалдуулаад элһэн дээрэ хүльбэрхэдэнь, бэень зузаан хуягтай болошохо юм. Тиигээд байхадаа, эмэ гахайнуудые хуряажа, эзэрхэн ээрээд ябадаг. Ондоо эрэ гахайн ойртоо һаа, тэрээнтэй буугай һомон мэтэ түргөөр оролсожо, ташаагаа хадаралсажа, нэгэнэйнгээ гэдэһэ гаргаһаншье ушарнууд байдаг.

Зунай сагта мүшэрнүүдые модондо түшүүлжэ, дээрэһээнь харганаа мэтэ юумээр хушаад, урса хэхэ. Тэрэнь үүдэтэй байдаг. Досоонь ороод хэбтэхэдэнь, боргооһоной хазахань барагтай болодог байгаа, бороодошье туһатай. Үбэлэй сагта үдэрынь наруули газарта ногооной үндэһэ малтажа эдинэ, хулганаанай суглуулһан мэхээр оложо эдинэ. Хабар, үбһэ ногооной ургаадүйдэ, намар, газарай хүрэхэ багта, хүбхэн дотор байһан улаан хорхой бэдэржэ эдихэ. Үхэһэн амитанай һэе эдихэеэ сээрлэхэгүй. Эхыень алаад, гэдэһыень гаргажа хаяад торойнуудыень эдижэрхиһэн байха юм. Тиигээд хүнэй хойноһоо мүрөөрнь дахаад, отогтош хүрэжэ ерэхэ бшуу. Хомхойнь тэрэ тухай гээшэ аабза.

Лодон ЛИНХОВОИН