БАЙГАЛАЙ НАМАР

В. Урбазаевай гэрэл зураг

Алдарта Байгал арюухан далайдамнай алтан намар айлшалан ерэнхэй. Аажам наруули үдэрнүүд һубарина. Ута намарнай ерэбэ гэжэ зон баясадаг. Байгалай эрьеын ой модоной гайхалтай һайхан гээшэнь! Шэнэһэн тужа соогуур ябахада, унаһан шэлбүүһэниинь хүл доро зөөлэхэнөөр бамбалзана. Тойроод аалин намдуу...

Шэнэһэн ой набшаһата модоор удангүй һэлгэгдэнэ. Уляаһан шара улаан набшаяа гүбинхэй. Мүшэртөө үлэһэн набшаһаниинь аалихан һэбшээндэ һэршэгэнэлдэн, шэхэндэ аятай зохидхоноор дуулдана. Эндэ хүнэй алхам бүхэн сууряатана. Удаан ябаһанай һүүлдэ зогсожо амарнабди.

Добонуудай наруули үбэрөөр, набтар газараар, харгын захаар улаахан үрэ жэмэстэй хүрин һөөгүүд нюдэ алдама холо руу нэбшыдэг. Энэ хүрин улаан үнгэ байгаалиин бэлэг мэтээр үзэгдэдэг юм. Үзэсхэлэн һайхан намарай шэрэ будаг энэ сагые утадхажа, үнгөө буураһан модондо, һөөг бургааһанда, хагдаржа эхилһэн ногоондо ами үршөөнэ хэбэртэй. Харин бидэндэ, үхибүүдтэ, Байгалаймнай намар гоё һайхан үзэгдэл шэмэглэжэ, сэдьхэлдэмнай урма баяр асарна.

Ольга СЕРОВА
(Гунга ЧИМИТОВ оршуулба)