Хонин һара (Өөлмэ). Август

Монгол литээр БИШЭН һара. Буряадууд ХОНИН ҺАРА гэдэг. Август - зунай һүүлшын һара болоно. Энэ һарын тэнһээ хойшо ааяма халуун бууража, һүниндөө боро хюруу унажа, ногооной үзүүрые шүүдэртүүлжэ, аалинаар доро газарай ногооной шарлажа эхилхэдэ, намар тээшээ болоһониинь элеэр мэдэрэгдэнэ. Августын 2 ород литээр Ильин үдэр.Тиихэдэ һүүлшын аянга, аадарай орохо саг ерэдэг. Хура борооной оролго энэ һарада замхадаггүй. Зарим ушарта үершье ерээд, тэжээл бэлэдхэлгын хүдэлмэри һаатуулдаг байна. Иимэ бороое үһөө бороон гээд нэрлэдэг. Августын 18-һаа ногоон нэмэжэ ургахаяа болино. Зарим жэлнүүдтэ сагаан хюруушье унажа байхадаа болодог. Сагай намар тээшээ болоһые харуулан, суг мүшэд зүүн урда зүгһөө харагдажа эхилнэ.

Зунай һүүлшын һарада үрэ жэмэсүүд, таряалан онсо һайнаар эдеэшэнэ. Тиихэдэ энэ һарада һурагшад зунайнгаа амаралтын үедэ ямар ажал хэһэнээ согсолон гаргажа, һуралсалайнгаа шэнэ жэлдэ бэлдэжэ эхилнэд. Тэдэнэр наранай элшэ туяа бэедээ шэнгээжэ, хүсэ шадал нэмэнхэйнүүд, мүн ехэнүүдшье болонхойнууд. Тэдэнэр зунай үедэ хараһан ойлгоһоноо һуралсалдаа хэрэглэхэ арга боломжотой.


Даша-Нима Дондупов


<< гэдэргээ гаршаг саашаа >>