АНХАНАЙ ХЭШЭГТЭЙ ДАЙДАДА

1960-аад оноор шэнэ газар эдлэхэ ехэ уряа сууряан орон соогуур һүжэрөө һэн. Яруунын ноёд бэшэ аймагуудһаа гээгдэжэ хойно гараха дурагүй, манай аймаг газараар ехэ хизаар гээшэ гээд бүхы добо, хүдөө газарнуудаа бултыень хахалуулжархихадань, бүхы малайнь бэлшээри дуталдажа, колхозуудта хашалан үзүүлээ һэн. Бороо, үһээтэй зун бүришье хүндэ болоо. Адуун һүрэгөө Түрхэл абаашаһан Үльдэргын, Эгэтын колхозуудые дэмжэжэ, бэшэ совхозууд адуугаа тиишэ абаашажа захалаа. Саашаа болохо бүри хамтынгаа, үмсынгөөшье һубай үхэрнүүдые Түрхэл, Нохоони абаашажа зуһуулдаг болонхой гээшэ.

Гушаад жэлэй туршада олон тоото адуун һүрэгэй болон һубай малай байдаг болоһоор Түрхэлэй губи талын бургааһа хартаганаан малда эдигдэнэ, гэшхэгдэнэ, шэбхэ шабааһаар үтэгжэжэ, шарайнь жэлһээ жэлдэ һэргэн сахилжа байна. Сабшалангай газар үргэдэнэ. Колхозууд тэндэ үбһэ ехые хуряажа амташаа. Үльдэргын «Коммунизм» колхоз зелёнко таряад туршаа ха. Түрхэл адуунда таарамжатай нютаг гэжэ аймаг соогоо тодоронхой. Мүнөө яруунынхид адуугаа үдхэдэг нютаг Түрхэл, Заза, Нохоони болонхой. Эндэ адуунай түл һайн абтана. 1990 ондо «Коммунизм» колхозой үнинэй адуушан Дамба Ширапович Доржиев зуун гүүнһээ зуун унага абажа суурхаа һэн. Үнгэрэгшэ жэл Түрхэлэй адуушад зуун гүүнһээ далаад унага абаһан байна.

Мүнөө Яруунын колхоз, совхозуудай табан мянга табан зуугаад адуун ондо орожо байна.


Цокто НОМТОЕВ,
Буряадай арадай уран зохёолшо


<< гэдэргээгаршаг саашаа >>