1.4.3. ЕХЭ ҮЗЭГҮҮД
Үзэгүүд ехэ болон бага гэжэ илгаатай. Мэдүүлэл бүхэниие ехэ үзэгөөр эхилжэ бэшэдэг. Тэрээнһээ гадна тусхайта нэрэнүүдые ехэ үзэгөөр эхилжэ бэшэдэг. Тусхайта нэрэнүүд иимэ байдаг.
- Хүнэй обог, эсэгын нэрэ, нэрэ: Бадмын Гарма, Базарон Нима, Чимитов Эрдэм Гомбоевич.
- Амитанай нэрэнүүд: Хотошо нохой, Цырен жороо, Дамбын эреэгшэн.
- Гүрэнэй тушаалта болон хүндэтэ нэрэтэнүүд, шагналнууд: Арадай Хуралай Түрүүлэгшэ, Буряад Республикын арадай уран зохёолшо, Россиин Федерациин Баатар, Хани барисаанай орден, Хүндэлэлэй грамота г.м.
- Орон нютагай, хото һууринай, хада уулын, нуур далайн, гол горхоной нэрэнүүд: Ази, Росси, Буряад орон, Улаан-Үдэ, Эгэтэ, Банзаровай гудамжа, Хамар-Дабаан, Байгал далай, Сэлэнгэ мүрэн г.м.
- Түүхэтэ хэрэг болон мартагдашагүй үдэрнүүдэй нэрэнүүд: Эсэгэ ороноо хамгаалгын Агууехэ дайн, Эхэнэрнүүдэй уласхоорондын үдэр, Буряад Республикын наян жэл.
- Һонин, һэдхүүл, ном, дэбтэрэй нэрэнүүд. Эдэ нэрэнүүд хашалта соо абтадаг: “Буряад үнэн” һонин, “Байгал” һэдхүүл, “Нойрһоо һэриһэн тала” гэһэн зохёол, “Буряад хэлэн” гэжэ дэбтэр г.м.